नेपालमा आयो हार्ले–डेभिडसनको इलेक्ट्रिक मोटरसाइकल, कति छ रेन्ज, मूल्य र टप स्पीड?

काठमाडौं । हार्ले–डेभिडसनको इलेक्ट्रिक मोटरसाइकल ब्रान्ड लाइभ वायरले दुई नयाँ इलेक्ट्रिक मोटरसाइकल सार्वजनिक गरेको छ। कम्पनीले युवा तथा नयाँ पुस्ताका राइडरलाई लक्षित गर्दै एस फोर होन्चो ट्रेल (S4 Honcho Trail) र एस फोर होन्चो स्ट्रीट (S4 Honcho Street) बजारमा ल्याएको हो।

यसअघि लाइभ वायरले साना उमेर समूह र शुरुआती राइडरका लागि ब्यालेन्सिङ इलेक्ट्रिक बाइक उत्पादन गर्दै आएको थियो। तर, पहिलो पटक कम्पनीले १२५ सीसी पेट्रोल मोटरसाइकलसँग प्रतिस्पर्धा गर्न सक्ने क्षमताका इलेक्ट्रिक मोडल सार्वजनिक गरेको हो।

एस फोर होन्चो ट्रेल विशेष रूपमा अफरोड तथा ट्रेल राइडिङका लागि तयार गरिएको छ। यसमा अफरोड प्रयोगका लागि उपयुक्त डर्ट टायर राखिएको छ भने हेडलाइट, इन्डिकेटर, टेललाइट, डिजिटल डिस्प्ले र रियर भ्यू मिरर जस्ता सडकमा आवश्यक उपकरणहरू हटाइएको छ।

अर्कोतर्फ, एस फोर होन्चो स्ट्रीट मोडल सार्वजनिक सडकमा चलाउन मिल्ने गरी डिजाइन गरिएको छ। यसमा सडकमा सहज यात्रा गर्न मिल्ने टायर र आवश्यक सबै सुरक्षा तथा कानुनी उपकरणहरू समावेश छन्।

दुवै मोटरसाइकल ट्युबुलर स्टिल फ्रेममा आधारित छन् र ब्याट्री बक्सलाई चेसिससँग एकीकृत गरिएको छ। पावरका लागि समान विद्युतीय प्रणाली प्रयोग गरिएको छ, जसमा सजिलै निकाल्न मिल्ने दुईवटा १.७४ किलोवाट आवर क्षमताका ब्याट्री प्याक उपलब्ध छन्।

कम्पनीका अनुसार सामान्य प्रयोगमा यी मोटरसाइकलले ८५ किलोमिटरसम्म रेन्ज प्रदान गर्छन्। यदि ३२ किलोमिटर प्रतिघण्टाको स्थिर गतिमा चलाइयो भने रेन्ज ११७.५ किलोमिटरसम्म पुग्न सक्छ।

दुवै मोडलको टप स्पीड ९५ किलोमिटर प्रतिघण्टा रहेको छ। साथै, मोटरसाइकलले शून्यदेखि ४८ किलोमिटर प्रतिघण्टाको गति केवल ३ सेकेन्डमा हासिल गर्न सक्छ।

वजनका हिसाबले एस फोर होन्चो ट्रेल ११४.७ किलोग्राम र स्ट्रीट संस्करण १२०.६ किलोग्राम रहेको छ। सीट हाइट क्रमशः ७३६.६ एमएम र ७६२ एमएम भएकाले कम उचाइ भएका राइडरका लागि पनि सहज हुने कम्पनीको दाबी छ।

लाइभ वायरले यी मोटरसाइकलहरू ताइवानको चर्चित स्कुटर निर्माता किम्कोसँगको सहकार्यमा विकास गरेको हो। किम्को विशेषगरी आफ्नो उन्नत आयोनिक्स (Ionex) स्वापेबल ब्याट्री प्रविधिका लागि परिचित छ।

कम्पनीले यसै वर्ष बेलायती बजारमा बिक्री सुरु गर्ने तयारी गरेको छ। एस फोर होन्चो ट्रेलको मूल्य ४,५९९ युरो र एस फोर होन्चो स्ट्रीटको मूल्य ४,९९९ युरो निर्धारण गरिएको छ। यी मोडलहरू अन्य अन्तर्राष्ट्रिय बजारमा पनि विस्तार हुने अपेक्षा गरिएको छ।